البحرين اليوم – (راس القدو)
عبّود.. إيه يا عبود.. هاذه عمره ما طلع منه الخير.. وطول عمره حافي ومنتف.. بس أكو آخرتها مرشح روحه للبرلمان.. من يوم يومه وهو طمّاع وشرّاني ويطالع اللقمة اللي في بوز غيره. آه منّك ولد طيبوه يا المطراش.. نافخ روحه وطالع فيها هالايام، وبسوّي روحه محد قده ورجل المهمات الصعبة… صدق يعني الواحد ما يتوقع أكثر من شدي في هالزمن الردي اللي طلعت فيه العنافيز وكبرت وشمّخت..
بس عبّود ومعروف أصله وفصله.. بس هذا الخرتيت ويش اللي رماه في هالرمية.. كان على حساب مسوي روحه شريف ونظيف.. وفي كل مجلس ضارب على صدره.. بعدين تطلع عيونه مفقوقة على البشت والهبْش وأكل الرهَش.. إيه يا زمن.. الواحد ما ليه أمان أبد.. ونفوس البشر صارت خبز وعجين، والدين عندهم صاير مثل التين.. يتغير في اليوم ألف مرة، وكله عشان الرّبابي والفخفخة ومعاش البرطمان، الزحرمان.. ألعن أبو الربابي اللي اتخلي الواحد يبيع أهله ودينه عشان يلحّس في رجايل هالسرسرية سودان الوجه اللي طبّوا علينه مثل الحرامية وباقوا البلد وذبّحوا أولادنا..
وكل هاده صوب وهاذي المرَه أم التراكي اللي تمّبي اتصير نائبة في البرلمان. ان شاء الله نايبة تاخذها! يعني طايحت الحظ ويش بتسوين لمّه تدخلين البرلمان؟ بتدافعين عن النسوان اللي اعتقلوهم وضربوهم وأهانوا كرامتهم، لو بتتكلمين عن حقوق أهل ديرتش اللي كل يوم يتفطرون ويتسحرون مسيلات دموع من هالمرتزقة أولاد الملاعين؟ والله لو أشوفها قدامي أحين لحقت وراها بالقدو وسبّحتها بماي التتن الخايس، عشان تعرف قدرها وقدر اللي قال ليها ترشّح روحها في الخرابة هاذي.
يا رب بحق هالليالي الأخيرة من شهر رمضان تراوينه يوم بهلواني في الأوادم الوسخة اللي باعوا أهلهم وأولادهم ودينهم عشان خمّة المجرمين الوحوش اللي يقتلون في الناس ويعذبون في النسوان والجهال وشردوا أهل الديرة وخلّوها للمجنسين الخايسين..
